यस्तो छ श्रीकृष्णको अन्तिम संस्कारको तयारी

सरकारले नायक श्रीकृष्ण श्रेष्ठप्रति सम्मान जनाउँदै अन्त्येष्टिको सम्पूर्ण खर्च व्यहोर्ने भएको छ । शनिबार राति भारतको अस्पतालमा निधन भएका नायक श्रीकृष्ण श्रेष्ठको पार्थिव शरीर सोमबार नेपाल ल्याई अन्त्येष्टी गरिने भएको छ ।

चलचित्र विकास बोर्डका अध्यक्ष धर्मेन्द्र मोरवैताका अनुसार श्रेष्ठको पार्थिव शरीर दिल्लीबाट अपराह्न १ बजे काठमाडौँ विमानस्थल ल्याइपुर्‍याइनेछ। विमानस्थलबाटै सिनामंगल, तीनकुने, नयाँ बानेश्वर, बबरमहल, माइतीघर, सिंहदरबार, पुतलिसडक, कमलादी हुँदै नेपाल प्रज्ञा प्रतिष्ठानमा दुई घण्टा श्रद्धाञ्जलिका लागि राखिने कार्यक्रम छ ।

त्यसपछि साँझ साढे पाँच बजे पार्थिव शरीरलाई कमलादी प्रज्ञा प्रतिष्ठानबाट कमलपोखरी, ज्ञानेश्वर, रातोपुल, गौशाला हुँदै पशुपति आर्यघाटमा अन्तिम संस्कारका लागि लगिनेछ ।

बोर्डले दर्शक र प्रशंसकलाई श्रद्धासुमन प्रकट गर्न र शव यात्रामा सहभागी हुन आह्वान गरेको छ।